“En julle sal aan my tafel versadig word…”
(Eseg. 39:20, OAV)
In die vorige Manna is die Skrif uit Hoogl. 1:12 gegee:: “So lank as die koning aan sy tafel was, het my nardus sy geur gegee.” Daar is in die lering ‘n eksplisiete verband uitgewys tussen die aansit aan die tafel met die Christus en die feit dat dit ‘n verbond “skryf” op die innerlike tafel.van die hart (teenoor die aansit aan tafel met godsdienstige mense wat jou as gevolg van hul sensuele en demoniese wysheid letterlik laat aansit met demone).
Dit is absoluut gepas dat daar dikwels in die Skrif dus gepraat word oor tafel en salwing, want die tafel is die plek waar die Gesalfde die salwing laat vloei! ‘n Ander verwysing hierna bring ‘n interessante perspektief in spel, uit die profetiese boek oor die Bruid, Esegiël: “En jy het gesit op ‘n pragtige bed waarvoor ‘n tafel reggemaak is en waar jy my reukwerk en my olie op neergesit het …” (Eseg. 23:41). Let asseblief op – alhoewel die bed (wat simbolies dui op intimiteit) hier teenwoordig is, die tafel is die plek waar die salwing verdiskonteer word.
In vorige Mannas oor die onderwerp van salwing is uitvoerig verduidelik dat salwing altyd korporatief van aard is. Binne die gemeensaamheid om die tafel is dit ‘n gepaste toeligting. Baie interessant dan, is dat die HERE in Eks. 34:1 aan Moses sê: “Kap vir jou twee kliptafels soos die eerstes; dan sal Ek op die tafels die woorde skrywe wat op die eerste tafels was, wat jy verbrysel het.” Die tien woorde wat ingegraveer is in die kliptafel deur die vinger van God, staan allerweë bekend as die tien gebooie, maar binne die Joodse tradisie word dit ook die tien woorde van God genoem. Enkele Skrifte benoem dit ook só, soos byoorbeeld Eks. 34:1 – “Toe het die HERE aan Moses gesê: Kap vir jou twee kliptafels soos die eerstes; dan sal Ek op die tafels die woorde skrywe wat op die eerste tafels was, wat jy verbrysel het.” (Kyk ook byvoorbeeld Deut. 10:2.)
Die Apostolic Bible Polyglot gee ‘n transliterasie van die Hebreeus na die Grieks, en in hierdie vertaling word “woorde” voorgehou as “rhema”! Dit sou dan beteken dat die tafels van die wet die Ou-Testementiese tipologiese ekwivalent is van die Nuwe-Testamentiese Bruid! Hand. 7:38 noem dit gepas dat Moses “lewende woorde” op Sinaï ontvang het om aan Israel te gee. Inderdaad – dáárdie woorde wat Hy toe gegee het, én die woorde wat die Bruid van Christus is, is “die woorde wat Ek tot julle spreek, … (vol) gees en … lewe” (Joh. 6:63).
Albert Barnes’ Notes on the Bible sê dat Eseg. 39 tipologies handel oor: “The purposes of the past dispensation shall be made clear to God’s people themselves and to the pagan.” In vers 20 word gestel: “En julle sal aan my tafel versadig word van perde en ruiters, van helde en alle soorte krygsmanne, spreek die Here HERE.” Die stad wat die profetiese belofte van herstel aan die “lewende woorde” van God bied, word Hamóna (vers 16) genoem, wat beteken: “multitude” of “corporate”! Die Bruid word aan die korporatiewe tafel van die Here versadig en bemagtig!
- Sela: Lees Jes. 2:3in die lig van hierdie lering.
- Lees: 1 Kor. 1-4
- Memoriseer: 1 Kor. 3:11-13
- Delf dieper: Luister na die cd-lering van Tom Gouws: Uit Sion sal die Wet uitgaan
