“Sou die HERE dan ongeduldig wees?”
(Miga 2:7, OAV)
Die sesde vrug van trots is ongeduld.
Hierdie woord, ‘ongeduld’, word net ‘n enkele keer in die Ou Vertaling gebruik, en wel amper in ‘n teenstrydige sin: “En daarom sal die HERE met ongeduld daarop wag om julle genadig te wees, en daarom sal Hy Hom verhef om Hom oor julle te ontferm; want die HERE is ‘n God van die gerig. Welgeluksalig almal wat op Hom wag!” (Jes. 30:18). Hierdie is ongeduld wat die mens ter wille is, en derhalwe is dit eintlik geensins ongeduld nie, maar eintlik lankmoedigheid (soos die Engelse vertalings dit dan ook voorhou). Dus bestaan die woord ‘ongeduld’ eintlik glad nie in die Bybel nie – dit is merkwaardig!
Ongeduldig kom so vyf keer voor (Num. 21:4; Rigt. 10:16 en 16:16; Job 21:4 en Sag.11:8), telkens as ‘n menslike attribuut, want dit word lynreg gestel teenoor Miga 2:7 – “Mag dit gesê word, o huis van Jakob: Sou die HERE dan ongeduldig wees?” Die antwoord op hierdie retoriese vraag is ‘n definitiewe nee.
Die rede hiervoor is dat alle ongeduld gewoonlik met tyd te make het, en God buite daardie realm bestaan. Hy is immers El Olam, die Ewige God (Gen. 21:33). Sy kinders leef óók in daardie tydlose realm, en kan derhalwe nie ongeduldig word nie! Tyd is altyd ‘n faktor van God se ewigheidsplan. Sela. Jes. 42:9 spel dit mooi soos volg uit: “Kyk, die vorige dinge het gekom, en nuwe dinge verkondig Ek; voordat hulle uitspruit, laat Ek julle dit hoor.”
Ons ken die bekende 1 Kor. 13:4 – “Die liefde is lankmoedig …”, wat in Engels in die ESV klink: “Love is patient …”, maar impatient kom aller verstaanbaar baie skaars voor. Die woord wat in die meer klassieker vertalings gebruik word, is eweneens nie die negatief nie, maar die positief, en wel: lankmoedigheid, of dan longsuffering, wat volgens Thayer beteken: “to be of a long spirit, not to lose heart; to persevere patiently and bravely in enduring misfortunes and troubles; to be patient in bearing the offenses and injuries of others; to be mild and slow in avenging; to be longsuffering, slow to anger, slow to punish”. Dit is ook deel van die vrug van die Gees (Gal. 5:22) in gelowiges.
Maar die teenoorgestelde of antoniem ontbreek bykans totaal. Dit kom wel voor in uitdrukkings soos haastig wees (bv. in Spr. 19:2), om nie moeg te word nie (bv. Gal. 6:9), of in verhale van mense wie se optrede van ongeduld spreek (Abram wat in Gen. 16:1-2 nie wou wag op God se belofte nie; Saul wat in 1 Sam. 13:6-12 nie wou wag vir Samuel om die offer te maak nie; die verlore seun wat nie kon wag op sy erfdeel nie, in Luk. 15:2, en andere).
Dit is van groot belang om te weet dat ongeduld duidelik jou vleeslike karakter uitwys en ‘n seker aanduiding is van die vrug van trots, want dit verhef die persoon bo die tye, wat in God se hand is (Ps. 31:15; Pred. 3:1-8; Joh. 7:6). In Hand. 1:7 word dit ondubbelsinnig uitgespel: “Dit kom julle nie toe om die tye of geleenthede te weet wat die Vader deur sy eie mag bepaal het nie …”
- Sela: Is hierdie vrug dalk aanwesig in jou?
- Lees: 26-27; 1 Joh. 5
- Memoriseer: 1 Joh.. 5:18
- Delf dieper: Lees Rock Mimms se boek: Add to your Faith die hoofstuk oor ‘Impatience’ (pp.85-90).
