“Yahweh … endows his king with power,
he exalts the horn of his Anointed”
(1 Sam 2:10, The Jerusalem Bible)
Ons weet dus op hierdie stadium dat Israel vir die duur van die Ou Testament as verbondsvolk gereken is. Tog is daar duidelik ‘n opdrag aan hulle om aan ander volke die goeie nuus van die ware God YAHWE bekend te maak. Tog, en dit is van die allergrootste belang, lig God in Jer 31:31-34 die sluier dat hierdie verbond met Israel in die toekoms sal verander, dat dit ‘n “nuwe verbond” sal word: “Kyk, daar kom dae, spreek die HERE, dat Ek met die huis van Israel en die huis van Juda ‘n nuwe verbond sal sluit; nie soos die verbond wat Ek met hulle vaders gesluit het op dié dag toe Ek hulle hand gegryp het om hulle uit Egipteland uit te lei nie—my verbond wat húlle verbreek het, alhoewel Ék gebieder oor hulle was, spreek die HERE. Maar dit is die verbond wat Ek ná dié dae met die huis van Israel sal sluit, spreek die HERE: Ek gee my wet in hulle binneste en skrywe dit op hulle hart; en Ek sal vir hulle ‘n God wees, en hulle sal vir My ‘n volk wees. En hulle sal nie meer elkeen sy naaste en elkeen sy broer leer nie en sê: Ken die HERE; want hulle sal My almal ken, klein en groot onder hulle, spreek die HERE; want Ek sal hulle ongeregtigheid vergewe en aan hulle sonde nie meer dink nie.
Volgens die profesie van Daniël in Dan 9:24-26 hou hierdie nuwe verbond verband met “’n Gesalfde”, “ a Messiah” (KJV). Die begrip vir “gesalfde” word vir die eerste keer in die Bybel vier keer in die boek Levitikus gebruik om na die priesterdom van die Ou Verbond te verwys. Maar dan in die lied van Hanna (1 Sam 2:1-10), wat sy sing toe sy Samuel na die tempel bring soos sy die Here beloof het, kom dit met ‘n totaal ander betekenisverband na vore. Hanna eindig haar lied (:10) met ‘n bepaalde profesie oor ‘n nuwe priesterorde wat God in die Nuwe Verbond tot stand gaan bring, waarvan Samuel die eerste prototipe is: “die HERE oordeel die eindes van die aarde, en Hy gee sterkte aan sy koning en verhef die horing van sy gesalfde”. Die meeste vertalings vertaal “gesalfde” as “anointed”, maar enkeles wys die profetiese implikasies reeds uit, soos die God’s Word-vertaling wat praat van “his Messiah”, en die 1899 Douay-Rheims Bible wat dit na die Grieks vertaal as “his Christ”!
Net daarna, in 1 Sam 2:35, na die profesie oor die dood van Elis se twee ontroue priesterseuns Hofni en Pínehas, maak God ‘n belofte aan Samuel – onthou nou wie hy prototipies verteenwoordig: die Nuwe Verbondse priesterorde – en sê: “En Ek sal vir My ‘n getroue priester verwek wat sal handel soos dit in my hart en in my siel is, en Ek sal vir hom ‘n bestendige huis bou, sodat hy al die dae voor die aangesig van my gesalfde kan wandel.”
Hierdie “gesalfde” moet na regte met ‘n Hoofletter gespel word, soos byvoorbeeld die 1833 Webster Bible en die Jerusalem Bible (hierbo) dit vertaal. Die nuwe priesterorde sal agter die Gesalfde, Jesus die Christus, aanbeweeg, en hulle sal ‘n getroue priesterorde wees wat doen wat in God se hart en siel is.
- Sela: Verduidelik aan iemand die klemverskil tussen die ou en die nuwe verbond.
- Lees: Num 17 (veral :8 baie belangrik vir hierdie lering); Dan 8; Eseg 18
- Memoriseer: Eseg 18:32
- Vir dieper delf: Luister na Tom Gouws se cd-lering: Die heilige salfolie.
