“the bathing of the water in the saying”
(Eph 5:26, YLT)
As Jesus bid in die Onse Vader (Mat 6:13), vra Hy: “maar verlos ons van die Bose”. In die oorspronklike Grieks beteken die woordjie “verlos” letterlik om uitgeruk te word uit ‘n waterstroom. Hierin lê ‘n groot geheimenis opgesluit.
In Efes 5:26 sê Paulus dat ons skoongewas word “deur die waters van die Woord” (NV). Dis egter ‘n verkeerde vertaling om dit met ‘n hoofletter te spel, want die woordjie vir “woord” in hierdie teks is rhema en nie logos nie. Logos is die Woord, die Skrifte, wat ook ‘n getranskribeerde Yashua is. Rhema is die onderdele van die totaliteit van Logos. (Ons kom later in besonderhede by hierdie tema.) Die GW-vertaling praat dan tereg van dat ons gewas word deur “spoken words”. YLT noem dit mooi: “the bathing of the water in the saying”.
Rom 10:14 sê tereg: “En hoe kan hulle in Hom glo van wie hulle nie gehoor het nie? En hoe kan hulle hoor sonder een wat preek?” Elke prediker was jou met water (rhema) van sy woord, sy interpretasie van die Woord (logos).
Uiteraard sny almal nie die Woord reg nie (2 Tim 2:15), en derhalwe is daar dikwels troebel waters waarmee mense bedien word.
Daar is dus aan die een kant mense wat die Woord verkondig omdat God sy woorde in sy mond gelê het (Eks 4:15; Num 12:8; Jes 51:16; Jer 1:9). ‘n Goeie voorbeeld hiervan is iemand soos Nego, van wie in 2 Kron 35:22 gesê word: “Josía het egter sy gesig nie van hom afgewend nie, maar homself onkenbaar gemaak om teen hom te veg; hy het nie geluister na die woorde van Nego uit die mond van God nie …” Die woorde van God uit die mond van Nego ….
Maar die aan die ander kant is die teendeel ook waar – in Eseg 13:7 word hierdie bedienaars soos volg getakseer: “Het julle nie ‘n bedrieglike gesig gesien en leuenagtige waarsêery gespreek nie deurdat julle sê: Die HERE spreek, terwyl Ék nie gespreek het nie?” In Eseg 22:28 nog sterker: “En sy profete pleister vir hulle met los kalk deur bedrieglike gesigte te sien en vir hulle leuenste voorspel met die woorde: So sê die Here HERE—terwyl die HERE nie gespreek het nie.”
In Eseg 32:2 word daar dan interessant genoeg verwys na Satan (hier prototipies verteenwoordig deur die koning van Egipte) as ‘n draak wat die waters bevuil: “En jy was soos ‘n draak in die groot water, en jy het uitgebreek in jou strome en die waters geroer met jou pote en die strome daarvan troebel gemaak.” In Open 12:6 word vertel hoe die Draak ‘n rivier van waters agter die kerk aanspoeg, om haar te verswelg.
Hiermee dan die belangrike insig – Satan se primêre sfeer van invloed en die belangrikste wyse waarop hy gelowiges skade berokken, is dat hy hulle met vals lering en gekontamineerde Woordbediening verswelg. Dít vorm ‘n omhulsel van afgodery, ‘n covering of darkness.
- Sela: Die laaste paragraaf het geweldige implikasies vir jou. Bedink dit.
- Lees: 1 Sam 4-6
- Ondersoek die vervulling: 1 Sam 5:2-4 (Wenk: Rom 14:11; Fil 2:10).
- Delf dieper: Luister na Tom Gouws se cd-lering: Die dier wat is wat nie is nie.
