“En hulle sal uitgaan en die lyke sien …”
(Jes. 66:24a, OAV)
Uiteindelik kan ons uitkom by Jes. 66:24, wat baie mense interpreteer as ‘n duidelike heenwysing na die realiteit van die hel: “En hulle sal uitgaan en die lyke sien van die mense wat teen My opgestaan het; want hulle wurm sal nie sterwe en hulle vuur sal nie uitgeblus word nie, en hulle sal afgryslik wees vir alle vlees.” Om dié gedeelte reg te verstaan, moes ons ver paaie loop, onder andere om uitvoerige eksegeses op drie betekenisvlakke van Jes. 65 & 66 te maak. Die doel daarvan was nie net om ‘n onnodig lang konteks te verskaf nie, maar dit het ons uiteindelik veel gehelp om te demonstreer hoe die Ou Testament sinryk en verantwoordelik in die lig van die Nuwe Testament gelees behoort te word.
In die lig van die vuur wat oor die aarde sal kom, profeteer Jes. 66 sal die kennis van die evangelie van heerlikheid oor die aarde kom. Dit word in verskeie ander tekste in die Ou en Nuwe Testament uitgespel:
- “Want die aarde sal vol word met die kennis van die heerlikheid van die HERE soos die waters die seebodem oordek.” (Hab. 2:14)
- “Want God wat gesê het dat daar uit duisternis lig moet skyn—dit is Hy wat in ons harte geskyn het om die verligting te bring van die kennis van die heerlikheid van God in die aangesig van Jesus Christus.” (2 Kor. 4:6).
- “dat die God van onse Here Jesus Christus, die Vader van die heerlikheid, aan julle die Gees van wysheid en openbaring in kennis van Hom mag gee …” (Efes. 1:17).
- “Immers, sy goddelike krag het ons alles geskenk wat tot die lewe en godsvrug dien, deur die kennis van Hom wat ons geroep het deur sy heerlikheid en deug …” (2 Pet. 3:1).
Volgens Jes. 66:22 sal die Bruid, wat uit die ou priesterorde van Lévi gehaal is (Heb. 7:11-12; Jes. 66:21; 61:6; Mal. 3:3; Open. 1:6; 5:10), dán voor Sy aangesig leef as “die nuwe hemel en die nuwe aarde” (die gelykstelling vind in vers 22 plaas). Hierop volg vers 24: as hulle “uitgaan”, sal hulle “die lyke sien”. Die woordjie “uitgaan” beteken eerder: “shall go forth” (soos in die meeste vertalings). John Gill, in sy Exposition of the Entire Bible, verduidelik dit as: “those constant and spiritual worshippers shall go forth from the holy mountain Jerusalem, the church of God”. As ons dit in ons terminologie moet omsit, sou dit sê: hulle wat God in gees en waarheid aanbid, sal voortkom uit Sion as die Bruid.
En uit dié posisie van outoriteit sal hul steeds deel wees van geestelike byeenkomste (soos Jes. 66:23 in Ou-Testamentiese terme uitspel), hulle sal steeds bou en plant en werk (Jes. 65:21-22), steeds ‘n fisiese nageslag hê (Jes. 65:23; 66:22), steeds evangelisasie doen (Jes. 66:19), en die dood sal steeds deel van hulle elkedagse realiteit uitmaak (Jes. 66:24). Hierdie gedeelte gaan nie oor die duisendjarige vrederyk wat voorlê nadat Jesus gekom het nie – dit is die realiteit waarbinne ek en jy (steeds) in die Nuwe Verbond leef. Dit het duidelik ook niks te make met die hel en die sogenaamde “hiernamaals” nie.
- Sela: Hoe verklaar jy “hulle wurm sal nie sterwe nie” in die lig van Job 17:13-14 en 24:20.
- Lees: 17-19
- Ondersoek die OT-tipologie: 17:20 (in die lig van die lering)
- Delf dieper: Luister na Gideon van Eeden se cd-lering: Die Bruid het die Stof om die aarde te formeer
